«Благаслаўлёны Бог і Айцец Пана нашага Езуса Хрыста.

Ён у вялікай Сваёй міласэрнасці адрадзіў нас

праз Уваскрасенне Езуса Хрыста з памерлых да жывой надзеі» (1П 1,3).

ксёнз лельчицы, ксёндз Вінцэнты Віталіс МЫШОНА
ксёндз Вінцэнты Віталіс МЫШОНА

Дарагія парафіяне!

Хрыстус Уваскрос! Сапраўды Уваскрос! Аллелюя!

Дзеля нашага збаўлення Бог правёў Езуса праз цярпенні і смерць да радасці новага жыцця ў паўстанні з мёртвых. Сваёй любоўю Ён ачысціў нас ад грахоў, праліў найкаштоўнейшую Кроў Адзінароднага Сына, каб мы сталі перад Богам, аздобленыя справядлівасцю. Абмытыя водамі святога хросту, які бярэ пачатак у таямніцы Пасхі, мы імкнемся да нашай Абяцанай Зямлі, Збаўлення, вечнага жыцця, сузірання Бога бясконцага ў Міласэрнасці. Хрост — гэта пачатак, а штогадовае святкаванне Пасхальнай Таямніцы — гэта і аднаўленне ў перажыванні нашага Збаўлення.

Няхай любоў Бога, аб’яўленая ў перамозе нашага Пана над грахом, смерцю і недахопам надзеі, шчодра напоўніць нашы сэрцы, каб мы, пакідаючы ранейшае жыццё, станавіліся ў сучасным свеце сведкамі Хрыста, гатовымі несці Добрую Вестку ўсім, хто яе яшчэ не ведае.

Няхай паўсталы з памерлых Езус загосціць у нашых сем’ях, месцах працы і адпачынку. Няхай Ён дапаможа нам пераадолець усе цяжкасці і сумненні. Няхай моц Яго Уваскрасення правядзе нас праз штодзённасць да вечнасці.

Няхай радасць і спакой, дары Змёртвыхпаўсталага дадаюць нам сіл і становяцца крыніцай сведчання пра жыццё, поўнае веры. А Марыя, якая ядналася са сваім сынам, стоячы пад Крыжам, а цяпер цешыцца прыбываннем з Ім у хвале неба, няхай будзе нашай Спадарожніцай на шляху веры і даверу да Добрага Бога. Марыя, Маці Укрыжаванага і Уваскрослага Пана, якая вучыць нас чэрпаць мудрасць з болю і слёз, няхай дапамагае нам адкрываць перамененае Аблічча Хрыста ва ўсім, што знявечанае і ўкрыжаванае на шляхах служэння Богу і чалавеку ў Касцёле і  свеце.

Няхай Хрыстовы спакой, які напаўняе нашы сэрцы, разальецца на ўсе асяроддзі, у якіх мы жывём. А тым, хто перажывае сумненні, няхай дадае адвагі і суцяшэння наш давер і радасць жыцця!

Радасных і шчаслівых святаў Вам, дарагія вернікі!

Хрыстус Уваскрос! Сапраўды Уваскрос! Аллелюя!

Пробашч парафіі Найсвяцейшага Сэрца Пана Езуса і Маці Божай Фацімскай ксёндз Вінцэнты Віталіс МЫШОНА.

Если вы нашли ошибку, пожалуйста, выделите фрагмент текста и нажмите Ctrl+Enter.

Ответить

Войти с помощью: