Працягваюцца выступленні калектываў мастацкай самадзейнасці клубных устаноў культуры нашага раёна на пляцоўцы каля цэнтра культуры.
Сваёй самабытнай творчасцю жыхароў Лельчыц добразычліва віталі калектывы мастацкай самадзейнасці Прыбалавіцкага сельскага дома культуры: вакальнае мужчынскае трыа «Цімохі», вакальны ансамбль, а таксама салісты.
Прыемна і радасна чуць народную, аўтэнтычную песню ў выкананні «Цімох», а іх душэўныя пакуты паднялі настрой усіх слухачоў. Важна адзначыць, што іх выступленне ўразіла не толькі нашых гледачоў, але і журы регіянальнага смотру-конкурсу «Грай, гармонік», які праходзіў 27 ліпеня ў гарадскім пасёлку Ельск. Мужчынскае трыа ўзнагароджана Дыпломам І ступені.
Мілагучна спяваюць удзельніцы ансамбля «Купалінка». Песні продкаў, якія дайшлі да нашых дзён, усё гэтак жа кранаюць душу і сэрца, бо яны напоўнены непаўторным каларытам, самабытнасцю і любоўю да сваёй малай радзімы.
Асобна хочацца сказаць пра Кацярыну Акуліч, якую гледачы не хацелі адпускаць са сцэны. Яе жарты, вершы, прыпеўкі, песні нікога не пакінулі абыякавым.
Шмат шчырых апладысментаў і цёплых слоў гучала ў адрас удзельнікаў канцэрта і кіраўніка дома культуры — Леаніда Дрынеўскага. Жадаем артыстам як мага больш новых прыемных сустрэч з гледачом, каб любоў да роднай песні ніколі не згасала.
А нашы творчыя сустрэчы ў нядзелю будуць працягвацца да канца жніўня. Заўжды чакаем цябе, наш шаноўны слухач!
Юрый МАРКЕВІЧ,
рэжысёр раённага цэнтру культуры і народнай творчасці.