Рецепт простого теплого салата с курицей для легкого ужина
Жнівеньскія вечары з лёгкай прахалодай — час, калі лета яшчэ не скончылася, але думкі пра хуткую восень і зіму займаюць галаву ўсё больш. Дастаеш пухнатую коўдру і шарсцяныя світары, а на стол хочацца паставіць што-небудзь цёплае.
Сезон гарачых наварыстых супоў, тушанай бульбы, пірагоў з яблыкамі і карыцай яшчэ наперадзе. А стравы выключна з гародніны і садавіны, што ратавалі ў спякотныя дні, ужо хочацца адставіць убок.
Можа, цёплая салата? Гэта і не зусім гарачае, аднак і не салата ў звычайным разуменні. Нешта памежнае. Як і жнівень з днямі, напоўненымі яркімі сонечнымі промнямі, але па-восеньску халоднымі начамі. Тут на першы план выходзіць пошук балансу, імкненне да новага без развітання са старым.
Вам спатрэбіцца:
Мяса курыцы без костак (філе, сцягно) — 250 г
Пекінская капуста — 150 г
Гуркі — 2–3 шт.
Памідоры — 2 шт.
Чырвоная цыбуля — палова галоўкі
Соль, зеляніна на смак
Для запраўкі:
Аліўкавы алей — 2 ст. л.
Гарчыца ў зерні — 1 ст. л.
Мёд — 1 ч. л.
Сок паловы лімона
У якасці свежай, хрумсткай асновы бяром пекінскую капусту (можна замяніць на ліставую салату), якую шаткуем так, каб яе было зручна прыхапіць відэльцам. Дадаём у міску свежыя гуркі, парэзаныя на невялічкія брусочкі, і памідоры, парэзаныя долькамі. Туды ж — чырвоную цыбулю паўкольцамі.
Пакуль займаемся гароднінай, можна паралельна смажыць курыцу на сярэднім агні з невялікай колькасцю алею. Накрываць патэльню не трэба, будзе смачней, калі на мясе з’явіцца прыгарка. Смажым нядоўга, хвілін 10—15 з кожнага боку. Гатовую курыцу выкладваем на гародніну.
Дапаўняем страву соусам, для якога змешваем аліўкавы алей, гарчыцу, лімонны сок і мёд. Солім і пасыпаем зелянінай на смак. Перамешваем, і адразу ж можна ўжываць.
